[長文慎入」
最近山野龍咁威鬧得沸沸揚揚，呼聲四起， 有人歡喜有人愁。 看罷各大行山群組的貼子，心里很不舒服，想打點東西。
點解心里唔舒服呢？
我都問自已。
有呢個披廚， 可以警惡懲奸，等D
不負責任的山野使用者得到懲罰，維持山界正義， 唔好咩？有咩問題啊？
嗯。。。諗諗下又好似係幾好， 我一時間答唔到點解心有戚戚然。
"係咪身有屎啊？"
自我審查一番後， 我都唔知自已係咪叫身有屎。 皆因從網上言論提及， 九大石澗皆在集水區附近， 玩澗同游水塘水無分別。 唉也。。。 咁就奶野啦。 九大石澗我差唔多玩過晒， 咁即係聽鞭屍？
再細想下， 好似明白點解唔鐘意龍咁威個披廚了： 突然多了一把放大鏡架在各人頭上， 而你不知唔那一天會聚焦於你頭上。
"咁咪好囉！ 等D人唔好亂咁黎！"
岩啊！肯定呢個放大鏡可以做到監察山野既作用。 但我想討論既問題係， 到底個放大鏡將事件放到幾大先叫合理？
大媽水塘，搖楊梅樹事件。
你問我100 次我答你100 次：
係， 絕對係佢地唔岩！
咁唔岩要罰！ 罰咩？ 睇網上新聞， 之前係水澇漕比人拉左個2 位罰$500.
現在大媽比人點相之餘， 人身攻擊， 有人私訊鬧佢，甚至有人留言祝佢快D去死。
佢係錯左，但係咪錯到嬲到要攞左佢條命？
"要全香港人飲佢D沖涼水！ 搞錯！"
直觀下佢水塘游水>>污染水源>> 大家飲污水。 當然係嬲。
但係呢度容我停一停， 諗一諗：
到底大家係咪真係飲到佢D沖涼水？
才疏學淺下， 唯有上網查一查香港供水系統， 參考連結如下：
水務處：
https://www.wsd.gov.hk/…/total-water…/local-yield/index.html
本港水庫供水只佔本地供水2-3 成，即有7 成以上水是東江水。 而萬宜水庫又只是其中一個集水庫， 容我粗略計算， 有機會飲到萬宜水庫水的香港人<5%. 而食水入屋前是會經過處理相信大家都知。 如果未經處理前， 要你飲一啖：
大媽游完的萬宜水庫 vs東江水，你會點選擇？
如果污染水源是指責的根據。在未處理前， 供本港食水7 成以上的東江水應該比大媽水塘水更差，大家何不留點力氣去嘈東江水？
"咁即係你撐大媽啦！ 咁即係你覺得落水塘游水無問題啦！即係你撐個D人既不負責任行為啦！"
唔係。 游水塘係唔岩。而大媽游水塘只是舉例述之。 我想講的重點是， 大家將呢件事放大左幾多，但咪放大到一個不合理的程度了？
諗到呢度， 我好似答到自已點解心有戚戚然了：
我不懷疑山野龍咁威呢個披廚可以監察山野人士行為，但令我不安的是隨之而起的群眾反應，無限上綱上線的攻擊漫罵和不理性的爭吵。
又退一步諗， 宇宙已經不能阻止山野龍咁威的掘起了。 愛食花生是人的本性，誰人能擋呢？
"你都改變唔到咩架啦！咁你仲沖出黎柒？！"
我唔知打篇文討論龍咁威算唔算沖出黎柒。但如果打篇文討論個披廚都唔得，咁就呢個原因已經足夠我沖出黎了。
Search